נתנאל אלקים

תהילים קיט - אות ת

תִּקְרַב רִנָּתִי, לְפָנֶיךָ יְהוָה; כִּדְבָרְךָ הֲבִינֵנִי.
תָּבוֹא תְּחִנָּתִי, לְפָנֶיךָ; כְּאִמְרָתְךָ הַצִּילֵנִי.
תַּבַּעְנָה שְׂפָתַי, תְּהִלָּה: כִּי תְלַמְּדֵנִי, חֻקֶּיךָ.
תַּעַן לְשׁוֹנִי, אִמְרָתֶךָ: כִּי כָּל-מִצְו‍ֹתֶיךָ צֶדֶק.
תְּהִי יָדְךָ, לְעָזְרֵנִי: כִּי פִקּוּדֶיךָ בָחָרְתִּי.
תָּאַבְתִּי, לִישׁוּעָתְךָ יְהוָה; וְתוֹרָתְךָ, שַׁעֲשֻׁעָי.
תְּחִי נַפְשִׁי, וּתְהַלְלֶךָּ; וּמִשְׁפָּטֶיךָ יַעֲזְרֻנִי.
תָּעִיתִי, כְּשֶׂה אֹבֵד; בַּקֵּשׁ עַבְדֶּךָ-- כִּי מִצְו‍ֹתֶיךָ, לֹא שָׁכָחְתִּי.

תהילים קיט - אות נ

נֵר-לְרַגְלִי דְבָרֶךָ, וְאוֹר לִנְתִיבָתִי.
נִשְׁבַּעְתִּי וָאֲקַיֵּמָה, לִשְׁמֹר מִשְׁפְּטֵי צִדְקֶךָ.
נַעֲנֵיתִי עַד-מְאֹד; יְהוָה, חַיֵּנִי כִּדְבָרֶךָ.
נְדוּבוֹת פִּי, רְצֵה-נָא יְהוָה; וּמִשְׁפָּטֶיךָ לַמְּדֵנִי.
נַפְשִׁי בְכַפִּי תָמִיד, וְתוֹרָתְךָ לֹא שָׁכָחְתִּי.
נָתְנוּ רְשָׁעִים פַּח לִי, וּמִפִּקּוּדֶיךָ לֹא תָעִיתִי.
נָחַלְתִּי עֵדְוֹתֶיךָ לְעוֹלָם: כִּי-שְׂשׂוֹן לִבִּי הֵמָּה.
נָטִיתִי לִבִּי, לַעֲשׂוֹת חֻקֶּיךָ; לְעוֹלָם, עֵקֶב.

תהילים קיט - אות א

אַשְׁרֵי תְמִימֵי-דָרֶךְ-- הַהֹלְכִים, בְּתוֹרַת יְהוָה.
אַשְׁרֵי, נֹצְרֵי עֵדֹתָיו; בְּכָל-לֵב יִדְרְשׁוּהוּ.
אַף לֹא-פָעֲלוּ עַוְלָה; בִּדְרָכָיו הָלָכוּ.
אַתָּה צִוִּיתָה פִקֻּדֶיךָ-- לִשְׁמֹר מְאֹד.
אַחֲלַי, יִכֹּנוּ דְרָכָי; לִשְׁמֹר חֻקֶּיךָ.
אָז לֹא-אֵבוֹשׁ; בְּהַבִּיטִי, אֶל-כָּל-מִצְו‍ֹתֶיךָ.
אוֹדְךָ, בְּיֹשֶׁר לֵבָב-- בְּלָמְדִי מִשְׁפְּטֵי צִדְקֶךָ.
אֶת-חֻקֶּיךָ, אֶשְׁמֹר; אַל-תַּעַזְבֵנִי עַד-מְאֹד.

תהילים קיט - אות ל

לְעוֹלָם, יְהוָה-- דְּבָרְךָ, נִצָּב בַּשָּׁמָיִם.
לְדוֹר וָדוֹר, אֱמוּנָתֶךָ; כּוֹנַנְתָּ אֶרֶץ, וַתַּעֲמֹד.
לְמִשְׁפָּטֶיךָ, עָמְדוּ הַיּוֹם: כִּי הַכֹּל, עֲבָדֶיךָ.
לֻלֵי תוֹרָתְךָ שַׁעֲשֻׁעָי-- אָז, אָבַדְתִּי בְעָנְיִי.
לְעוֹלָם, לֹא-אֶשְׁכַּח פִּקּוּדֶיךָ: כִּי-בָם חִיִּיתָנִי.
לְךָ-אֲנִי, הוֹשִׁיעֵנִי: כִּי פִקּוּדֶיךָ, דָּרָשְׁתִּי.
לִי קִוּוּ, רְשָׁעִים-- לְאַבְּדֵנִי; עֵדֹתֶיךָ, אֶתְבּוֹנָן.

תהילים קיט - אות ב

בָּרוּךְ אַתָּה יְהוָה; לַמְּדֵנִי חֻקֶּיךָ.
בְּשִׂפְתֵי, סִפַּרְתִּי; כָּל-מִשְׁפְּטֵי פִיךָ.
בְּדֶרֶךְ עֵדוֹתֶיךָ, שָׂשׂתִּי; כְּעַל כָּל-חוֹשֶׁק.
בְּפִקּוּדֶיךָ, אָשִׂיחָה; וְאַבִּיטָה אֹרְחוֹתֶיךָ.
בְּחֻקּוֹתֶיךָ, אֶשְׁתַּעֲשָׁע; לֹא אֶשְׁכַּח דְּבָרֶךָ.

תהילים קיט - אות נ

נֵר-לְרַגְלִי דְבָרֶךָ, וְאוֹר לִנְתִיבָתִי.
נִשְׁבַּעְתִּי וָאֲקַיֵּמָה, לִשְׁמֹר מִשְׁפְּטֵי צִדְקֶךָ.
נַעֲנֵיתִי עַד-מְאֹד; יְהוָה, חַיֵּנִי כִּדְבָרֶךָ.
נְדוּבוֹת פִּי, רְצֵה-נָא יְהוָה; וּמִשְׁפָּטֶיךָ לַמְּדֵנִי.
נַפְשִׁי בְכַפִּי תָמִיד, וְתוֹרָתְךָ לֹא שָׁכָחְתִּי.
נָתְנוּ רְשָׁעִים פַּח לִי, וּמִפִּקּוּדֶיךָ לֹא תָעִיתִי.
נָחַלְתִּי עֵדְוֹתֶיךָ לְעוֹלָם: כִּי-שְׂשׂוֹן לִבִּי הֵמָּה.
נָטִיתִי לִבִּי, לַעֲשׂוֹת חֻקֶּיךָ; לְעוֹלָם, עֵקֶב.

תהילים קיט - אות מ

מַה-אָהַבְתִּי, תוֹרָתֶךָ: כָּל-הַיּוֹם, הִיא שִׂיחָתִי.
מֵאוֹיְבַי, תְּחַכְּמֵנִי מִצְו‍ֹתֶךָ: כִּי לְעוֹלָם הִיא-לִי.
מִכָּל-מְלַמְּדַי, הִשְׂכַּלְתִּי: כִּי עֵדְוֹתֶיךָ, שִׂיחָה לִי.
מִזְּקֵנִים, אֶתְבּוֹנָן: כִּי פִקּוּדֶיךָ נָצָרְתִּי.
מִכָּל-דֶּרֶךְ רָע, כָּלִאתִי רַגְלָי: לְמַעַן, אֶשְׁמֹר דְּבָרֶךָ.
מִמִּשְׁפָּטֶיךָ, לֹא-סָרְתִּי: כִּי-אַתָּה הוֹרֵתָנִי.
מַה-נִּמְלְצוּ לְחִכִּי, אִמְרָתֶךָ: מִדְּבַשׁ לְפִי.

תהילים קיט - אות ש

שָׂרִים, רְדָפוּנִי חִנָּם; וּמִדְּבָרְךָ, פָּחַד לִבִּי.
שָׂשׂ אָנֹכִי, עַל-אִמְרָתֶךָ; כְּמוֹצֵא, שָׁלָל רָב.
שֶׁקֶר, שָׂנֵאתִי וַתּוֹעֲבָה; תּוֹרָתְךָ, אָהָבְתִּי.
שֶׁבַע בַּיּוֹם, הִלַּלְתִּיךָ: עַל מִשְׁפְּטֵי צִדְקֶךָ.
שָׁלוֹם רָב, לְאֹהֲבֵי תוֹרָתֶךָ; וְאֵין-לָמוֹ מִכְשׁוֹל.
שִׂבַּרְתִּי, לִישׁוּעָתְךָ יְהוָה; וּמִצְו‍ֹתֶיךָ עָשִׂיתִי.
שָׁמְרָה נַפְשִׁי, עֵדְוֹתֶיךָ; וָאֹהֲבֵם מְאֹד.

תהילים קיט - אות ה

הוֹרֵנִי יְהוָה, דֶּרֶךְ חֻקֶּיךָ; וְאֶצְּרֶנָּה עֵקֶב.
הֲבִינֵנִי, וְאֶצְּרָה תוֹרָתֶךָ; וְאֶשְׁמְרֶנָּה בְכָל-לֵב.
הַדְרִיכֵנִי, בִּנְתִיב מִצְו‍ֹתֶיךָ: כִּי-בוֹ חָפָצְתִּי.
הַט-לִבִּי, אֶל-עֵדְוֹתֶיךָ; וְאַל אֶל-בָּצַע.
הָעֲבֵר עֵינַי מֵרְאוֹת שָׁוְא; בִּדְרָכֶךָ חַיֵּנִי.
הָקֵם לְעַבְדְּךָ, אִמְרָתֶךָ: אֲשֶׁר, לְיִרְאָתֶךָ.
הַעֲבֵר חֶרְפָּתִי, אֲשֶׁר יָגֹרְתִּי: כִּי מִשְׁפָּטֶיךָ טוֹבִים.
הִנֵּה תָאַבְתִּי לְפִקּוּדֶיךָ; בְּצִדְקָתְךָ חַיֵּנִי.